| Is |
Athlete Weightlifter |
| Type | Sports |
| Gender | male |
Walter Arfeuille (°1952(?)) is e stuntman uut Vloamertienge die ol vele keirs in ‘t Guinness Book of Records is ekommn.
Zyn bynoame is De Bêeste. Arfeuille is surtout bekend van zyn stunts mi zyn tans.
Carrière als stuntman
Arfeuille is de jougsn van vuve. Up ‘t schole dei ‘n outbewerkieng en e gienk in ‘n bouw. Round zyn dertiene wos ‘n gewoare dat ‘n vele macht adde. Van toun vors is ‘n begunn entreneern me gewichtn, in de garage van ‘t uus van zyn ouders. Achter e poar joar wos ‘n Belgs kampioen ‘powerlifting’.
Up zyn 25-26 begost ‘n mi stunts in ‘t oopnboar. Ol met e ki krêeg John Massis uut Ôost-Vloandern, die toune bekend stoeg lik ‘n grotsn stuntman van Belgie, zwoare concurrensje. Walter Arfeuille sloat vuufdumers deur dikke planks mi zyn blôot andn. E kost ouk e plastiekn warmwoaterflessche opbloazn tout da ze sproung.
In 1990 trok ‘n mi zyn tans 271,5 kilo 17 cm van de ground: dat wos toune e weireldrecor.
Moa de grotsn stunt van Arfeuille wos up 9 juni 1996 in Diksmude: e trok e tring van mêer of 223 ton 3,2 meters vôort mi zyn tans.
Gerechtelikke probleemn
In 2001 kwam Arfeuille up e kwoalikke maniere in ‘t nieuws. De Correctioneeln Rechtbank van Yper verôordeelde nem tout 4 joar bak woavan 2 joar vôorwoardelik, omda ‘n eroïne edeald adde in zyn fitnesscentrum. Arfeuille gounk ni in beroep en wos content da ‘n estekt wos. Zyn standbeeld da ze giengn zettn an ‘t cultureel centrum in Vloamertienge goat er verzekers nu ni mi van kommn.
Bronn
- Gazet van Antwerpen, 31 mei 2001
- De Standaard, 15 oktober 2002