| From | South Africa |
| Gender | male |
S.G. du Toit (*3 Februarie 1855 –† 3 Mei 1898, Rawsonville) was ‘n stigterslid van die Genootskap van Regte Afrikaners en eerste sekretaris van hierdie organisasie.
Lewe en werk
Stephanus George du Toit is op 3 Februarie 1855 gebore as die seun van Anthonie Eduard du Toit en Martha Elisabeth Charlotta Hauptfleisch. Op ongeveer twintigjarige ouderdom kom hy na die Paarlse Gimnasium om sy skoolopleiding te ontvang. Omdat hy teen hierdie tyd reeds volgroeid was, met ’n welige bos baard, het hy verkies om nie tussen die jong seuns in dieselfde klas te sit nie. Voorlopig neem hy dan private lesse by ds. S.J. Du Toit en loseer ook by hom in ’n buitekamer. Later begin hy om lesse by die Gimnasium by te woon.
Op 14 Augustus 1875 is hy een van die stigters van die Genootskap van Regte Afrikaners. Verskeie van die notules van die vergaderings van die GRA verskyn in sy handskrif. Nadat hy as onderwyser kwalifiseer word hy skoolhoof op Rawsonville, ’n pos wat hy tot met sy dood beklee.
Hy is getroud met Anna Aletta Smit. Die egpaar het ’n seun, Anthonie Eduard, wat later die rektor word van die Transvaalse Universiteitskollege, tans die Universiteit van Pretoria.
Op 3 Mei 1898 is S.G. du Toit op Rawsonville oorlede en word hier begrawe. Hoewel hy nie geskrifte nagelaat het nie, is hy van kultuur-historiese belang weens sy lidmaatskap van die GRA en die werk wat hy hier gedoen het ter bevordering van Afrikaans.
Bronnelys
Boeke
- Bouwer, Alba Afrikaans 100. Tafelberg-Uitgewers Bpk. Kaapstad Eerste uitgawe 1975
- Dekker, G. Afrikaanse Literatuurgeskiedenis. Nasou Beperk Kaapstad Elfde druk 1970
- Grové, A.P. Letterkundige sakwoordeboek vir Afrikaans. Nasou Beperk Vyfde uitgawe Eerste druk 1988
- Kannemeyer, J.C. Geskiedenis van die Afrikaanse literatuur 1. Academica, Pretoria en Kaapstad Tweede druk 1984
- Kannemeyer, J.C. Die Afrikaanse literatuur 1652–2004. Human & Rousseau Kaapstad en Pretoria Eerste uitgawe 2005
- Totius. Ds. S.J. du Toit in weg en werk. Versamelde werke 9. Tafelberg-Uitgewers Beperk Eeufees-uitgawe 1977
Tydskrifte en koerante
- Nienaber, P.J. Helde van ons taal. Die Taalgenoot, Augustus 1975