| Intro | South African artist |
| Was | Artist |
| From | South Africa |
| Type | Arts |
| Gender | male |
| Birth |
1938, Maseru, Lesotho |
| Death |
1971 |
Ephraim Ngatane (1938–1971) was ‘n Suid-Afrikaanse kunstenaar. Hy is in Maseru gebore en het sy kinderjare in Johannesburg deurgebring, waar hy sy skoolonderrig eers aan die Rooke Memorial School en daarná aan die Orlando High School ontvang het. In 1952 het hy hom by die Polly Street Kunssentrum aangesluit, waar hy deur Cecil Skotnes onderrig is. Hy was een van die eerste professionele kunstenaars wat dié sentrum opgelewer het. Ngatane het ook onder Duncan Hall, ‘n Amerikaanse sendeling, gestudeer.
Ngatane het aanvanklik net in waterverf en gouache, maar later ook in olieverf gewerk. Hy was ook een van die eerste Swart townshipkunstenaars. Hy het nie net die ellende en armoede van dié woonbuurte uitgebeeld nie, maar ook die humor in dié mense se bestaan. Sy helder kleurgebruik het ook daartoe bygedra dat somber tonele soms ‘n opgewekte element gehad het. Hy het die menslike figuur gebruik om die ervarings van leed, vrees en vreugde uit te beeld.
Ngatane het sy eerste eenmanuitstalling in 1962 en daarná talle suksesvolle uitstallings, ook in Londen, gehou. Van sy werk is in 1966 op die African Art Exhibition by die Piccadilly Gallery in Londen ten toon gestel. In dieselfde jaar is van sy werk op die Republiekfeestentoonstelling uitgestal. Ngatane is in 1971 ná ‘n kort kunsloopbaan oorlede.
Verwysings
Bronnelys
- Wêreldspektrum, Vol. 20, 205, ISBN 0 908409 61 3